Nama: Karmila Asri
Nim: 2210741003
Dibuat untuk memenuhi mata kuliah Menulis Karya Sastra Minangkabau 
Inspirasi dari kaba Sibuyuang Karuik

LORONG KAPADO  si Milah, umua nan baru tigo puluah, tuo balun mudo talampau, inyo baranak duo urang, anak sarupo anak balam, sikua jantan saikua batino, nan tuo anak laki-laki banamo si  Karuik.  Nan ketek si Kiah, baru baumua anam tahun, nan tuo baumua sapuluah tahun.
 

Birawari Siti Milah, sadang duduak di halaman, duduak bamanuang-manuang surang, hari nan sadang tangah hari, sadang  bunta bayang-bayang, sadang linduang saliguri, sadang litak-litak  ayam, sadang langang urang di kampuang, sadang rami urang di balai, tadanga ayam bakukuak, bunyi ombak badasau-dasau.
 

Mandanga bunyi nan bak kian, laruik hati maso itu, takana  untuang jo bagian, hiduik mularaik bakapanjangan, bak bakain tigo heto, dielo ka ateh tasingkok kaki, dielo ka bawah tasingkok kapalo, maliek juo ka lawik, bunyi ombak marusuah hati, ayia mato badarai- darai.
 

Diliek anak nan baduo, laruik tulang mamikiakan, nan labiah si Syamsiah, muko pucek tidak badarah, mato cakuang lihianyo panjang, tulang di dado elok dibilang, sarupo mayik sadang bajalan, kok ado urang manyarayo, manyuruah mamipiah lado, dapek makan karak babiak.
Lorong kapado ibu jo bapak, urang sapaham ka duonyo, sarupo laku jo parangai, samo pambangih jo pamberang, tidak ado bamuluik manih.
 

Diliek  anak yang berduo, larut diri mamikian, talabiah siKiah,
muko pucek indak badarah, mato cakuang lihianyo  panjang,
mengimbau, menyuruh menggiling lado, dapeklah inyo
makan karak basah.
 

Kan iyo samaso itu, untuang malang si Karuik, antah kok hari tidak elok, antah kutiko nan buruak, sadang batanak di dapua, manolong adiak si upiak Kiah, maambua ayam ateh pagu, ayam gadang Bagindo Baha, ayam pautan pamenan hati, malompek ayam ka pariuak, nasi tatunggang ka dalam abu, tidak     ado nan elok lai, nasi lah bacampua jo abu.
 

Maliek rupo nan bak kian, mambangih si Karuik, dirambah ayam sakutiko, tibo di tungku kapalo ayam, pacah banak ayam nantun, maambua-ambuakan diri, bak caciang kapanehan, matilah ayam sabanta itu.
Maliek rupo nan bak kian, manyasa si Karuik, takuik                kapado ibu jo bapak, alamat mati badan denai, manangih inyo katakutan, hilang aka lamah pikiran, tidak tantu kan disabuik.
 

Kan iyo si Upiak Kiah, manangih inyo katakutan, dituruik bapak ka tapi pasia, sadang maelo tali pukek, dikabakan parasaian,
 

“Lah malang kami baduo, nasi ditanak lah tabuang, tabuang ka dalam tungku, tidak dapek diambiak lai, cilako ayam nan kuriak, nasi dilendo ayam gadang, kini lah mati ayam nantun, mati ditokok di ajo den,” bakato sadang manangih, manggigia badan katakutan.
 

Maliek bapak alah bangih, mahariak mahantam tanah, raso dimakan anak kaduonyo, namuah mambunuah mati-mati, si Upiak Kiah, balari mancari si Karuik, kakak kanduang si Kiah, tampak kakak si Karuik, sadang duduak manggigia
katakutan, “Manolah Tuan Ajo Karuik, Bapak kito sangaik bangih, kini inyo mancari Ajo, kok dapek dibunuah mati.”
 

Mandanga kato nan bak kian, bakato si Karuik, bakato  sadang manangih, “Mano kau Upiak Kiah, elok pulang Adiak          dahulu, denai lari dari siko, mambaok untuang ka mano pai, disarahkan sajo garak Allah.
 

Mandanga ratok adiak kanduang, ibo hati bacarai jo adiaknyo, kok pulang si Upiak maso itu, alamat bacarai nyawo jo badan, bakato si  Karuik,
“Kalau baitu kato kau Upiak, elok bajalan kito kini, sabalun hari patang bana.”
 

Bajalan inyo kaduonyo, bajalan balari-lari ketek, takuik dikaja bapaknyo, dituruikkan labuah nan gadang dituruikkan ka mano ampu kaki, asa sabuik nak tarapuang, asa batu nak tabanam, disarahkan untuang pado Alah.
 

Bajalan juo bacapek-capek, bajalan baduo baradiak, sabuah tidak nan dibaok, bajalan jo hampo tangan, kok tibo hauih di badan, diminum ayia dalam banda.
 

Lah tampak batang marapalam , manguniang buah di batang, dipiliah  marapalam  nan rareh, dimakan marapalam ubek litak, duduak baduo di rumpun marapalam.
 

Kan iyo samaso itu, lalu urang di jalan, diliek anak nan baduo, babaju tamba tumamba, ruponyo kuruih kurang makan. Maliek parasaian anak nantun, ibo maliek urang nan lalu, disaponyo si  Karuik, “Mangapo kalian di siko, apo mukasuik datang ka mari.”
Mandanga kato nan bak kian, bakato si  Karuik, bakato  baibo hati, “Manolah Anduang urang di siko,
Kok lai parimbo urang di siko Siang-siangi malah padi;
Kok lai paibo urang di siko Tompang-tompangi malah kami.

Mandanga kato si  Karuik, laruik pikiran urang nan datang, bakato rang tuo nantun, “Mano kalian nan baduo, hari lah barambang patang, elok bamalam di rumah kami, usah bajalan tangah malam.”
 

Mandanga kato nan bak kian, sanang hati kaduonyo, “Kalau baitu kato Anduang, sananglah hati badan kami.”
Alah bajalan katigonyo, lah sampai di rumah urang nantun, duduak baduo dalam dapua, dek urang tuo nan panyayang, diambiak nasi dalam kampia, nasi dingin labiah pagi, disuruah makan kaduonyo.
 

Dek anak nan baduo, habih nasi dalam kampia, paruik nan sangaik lapa bana, lah sahari indak makan.
Sadang dek urang tuo nantun, maliek rupo nan bak kian, ibo maliek paja nantun, laruik hati mamandangi, balinang ayia mato, namun malam samalam nantun, tidak tajago anak nan baduo, talalok sampai pagi, dek sangaik latiah bajalan.
 

Dek untuang takadia Allah, ado surang urang tuo, mancari gadih tangguang, untuak karajo jo Ulando, manjadi babu anaknyo, untuak dibaok ka Batawi.
Mandanga kato urang tuo nantun, sananglah hati si Kiah, pado maliek Sari Anun, elok ngiang tabang jauah, laku parangai bak anjiang di labuah, tidak tahu taratik sopan, hilang taratik elok dahulu.
 

Lamo lambek balayia, tibolah kapa di Tanjung Periuk, palabuhan nan sangaik gadang, banyak kapa kalua masuak, pusek jalo pumpunan ikan, urang nan sangaik rami bana, maklum tuan tantang itu, ibu nagari Hindia nangko, di sinan duduak Tuan Basa, mamacik tampuak pulau nangko.
Padang Panjang jo Malalo Kaduo Tanjuang Pandai Sikek; Dirantang bajelo-jelo Dikumpa naknyo singkek.
Kaba baraliah ka si Karuik.
“Mari kito bajalan, bajalan-jalan ka Batawi, maliek kota nan
rami.”
 

Mandanga kato nan bak kian, manjawab Bagindo Karudin,
“Asal rusuah lai tapujuak, ka mano sajo kato Zainudin, ambo nan tidak manupang, hari Salasa kapa barangkek, tidak lamo kito di sanan, ganti maliek-liek nagari urang.”
Lah sudah kato mupakat, barisuak hari Salasa, bajalan bujang nan baduo, dibaok kopor ciek surang, panuah barisi pakaian. Dek lamo lambek di jalan, tampak kapa dari jauah, kapa api ka tanah Jawa, handak manuju Pasar Ikan.
 

Dek untuang takadia Allah, tibo di Kampuang Luar Batang, dalam daerah Pasa Ikan, ado surang parampuan, parampuan tuo urang Minang, sanan batanyo urang nantun, “Mano rang mudo nan baduo, apo mukasuik dalam hati, mangko duduak di siko, hari lah laruik tangah malam.”
 

Mandanga kato nan bak kian, manjawab Gindo Karuik, “Kami nan bukan urang di siko, baru tibo dari Palembang, dicari rumah kawan kami, kironyo lah pindah dari siko, hilang aka tampek  bamalam, tidak ado karib kabia, bari tompanglah kami di amai, tompang bamalam samalam nangko,” katonyo Gindo Karuik. 
 

Mandanga kato nan bak kian, diliek pulo rupo dipandangi, tampan rupo urang elok, urang barasa baiak-baiak, ibo maliek rang mudo nantun, “Kalau baitu kato Anak, turuikkan malah badan denai, bamalam di pondok ambo.”
 

Lorong kapado Gindo Karuik, diliek sajo jo suduik mato, tidak pueh mato mamandang, turun naiak darah di dado.
Batang kalikih mudo-mudo Dimakan sudah diparam;
Takilik iman di dado Maliak rupo si Sarinam.
Kayu kalek madang di lurah Ditarah lalu dilampaikan; Hati lakek pandanglah sudah Di muko tidak mangasan.
 

Lorong kapado Gindo Karuik  jo si Sarinam, bak antimun jo durian, sarupo api jo rabuak, kanai hati kaduonyo, nan labiah Siti Sarinam, maliek elok laku Karuik, budi baiak parangai elok, pandai batutua sando gurau, tahu kucindan baso-basi.
 

Maliek parangai kaduonyo, si Sarinam jo Karudin, lah maklum amai Sarijah, urang tuo nan arif bijaksano, alun takilek lah bakalam, bulanlah sangkok tigo puluah, tapi sungguah nan bak kian, pulang maklum kaduonyo, kok manjadi laki samo baruntuang kaduonyo.
 

Dek elok jalujuik amai Sarijah, mampatamukan kaduonyo, tidak taro ka disuruah, alah sapakaik kaduonyo, samo mangabek janji, samo sapakaik kaampeknyo, pucuak dicinto ulam tibo, bak mandapek durian runtuah.
Kan iyo Gindo Karuik, dek elok pambauran, rasaki batambah-tambah, kadaian ketek manjadi gadang, lah musahua kayo Gindo Karuik, dek untuang elok maso itu, dapeklah inyo anak parampuan, buliah pamenan bapak jo mandeh.
 

Kan iyo Gindo Karuik, takana bapak jo mandeh, kampuang raso manyaru juo, bakato inyo ka Sarinam,
“Manolah Adiak kanduang Sarinam, ado taniat dalam hati, handak pulang ka kampuang, iyolah kampuang di Minangkabau, taragak jo bapak mandeh, limo baleh tahun tidak basuo, antah hiduik antah mati, rantau Cino denai pakaikan.
 

Ambo bajalan balari capek, sampai ka rumah Amai Sarijah, urang sibuk mancari ambo, upeh polisi kota Batawi, ambo tukari namo ambo, banamo si Sarinam, supayo pamarentah tidak tahu, kampuang dialiah ka Jawa Timua, ambo pandai bahaso Jawa, ambo ditolong amai Sarijah, diakui anak kanduangnyo, surang tidak nan tahu, bahaso ambo urang Minang, urang manyangko urang Jawa, sampai balaki jo Gindo Karuik, tidak den sangko dunsanak kanduang.”
 

Kato sampai inyo pun pangsan, tidak tahu di dirinyo, marano manahan hati.
Mandanga curito si Sarinam, tapacak paluah gadang Gindo Karuik, mandingin badan maramang kuduak, ruponyo si Sarinam adiak kanduang balahan diri, ruponyo takawini di adiak kanduang.
 

Lah malang bana nasib badan, kok tahu urang kampuang, babaso babini jo adiak kanduang, tantu ka mandapek gala baru, badan bagala Bagindo Rutiang.
Tidak alu saalu nantun Alu tasanda di tabiang Kok tasanda di batuang
Buliah disaok jo daun tabu; Tidak malu samalu nangko Malu tacoreng di kaniang