SAMASO  si Syamsu ketek, maambiak inyo ka minantu, untuak manjadi kawan Siti Ramadhani. 

Samanjak dulu lah taniyaik manjapuik si Syamsu ka minantu. Kami caliak kami pandangi, laku elok parangai rancak, urang bujang bapusako, ado batunjuak baajari, indak sarupo bujang nan banyak, tibo kasawah inyo kasawah, wakatu manggaleh inyo manggaleh, sumbahyang nan limo indak tingga, itu bana nan mandayo, anak masak bapangaja.
 

Si Siti Ramadhani, inyo anak masak pangaja, muluik manih kucindan murah, anak cadiak elok laku, lai mangaji jo sikolah, indak pulo maantikan tangan,lapeh manjahik inyo ka dapua, diliek pulo rupo jo roman, sasuai bana jo si Syamsu, samo rancak kaduonyo.
 

Sanan bakato mandeh si Syamsu, “mano anak kanduang denai, ado sabuah mande katokan, lah banyak urang nan dating, maambiak anak ka minantu, lai surang nan katuju, si Siti Ramadhani urang Guci. 

Urang Guci kampuang nan limo, anak tungga si Nuraya, anaknyo surang tungga babeliang, indak ado adiak jo kakak, kamanakan dek Datuak Rajo Kuaso.
Bakato si Syamsu, “manolah mandeh kanduang denai, bukan murah urang bakudo, disabikkan rumpuik tiok hari, tapi sungguahpun baitu, tasarah ka mande jo mamak Jalelo, ambo manuruik jo bicaro. Putuih rundiang malam itu, Lorong kapado si Syamsu, anak urang pandai manggaleh, manggaleh kain baju sudah, indak ado hari tabuang, hari bapakai kasadonyo.
 

Hari Sanayan tibo di Baso, hari Sabtu  Rabaa di Bukittinggi, hari Jumaik di Padang Panjang, hari Salasa di Koto Baru, pakan batampuah kasadonyo, hari Akad sajo nan tempo, anak bujan rajin mancari, laku elok parangai baiak,urang nan tuo dihormati, nan ketek dikasihi.
Lah tibo hari Jumaik, alah nikah urang disurau, pulang samalam itu juo, baitu janji nan dikarang. 

Di hari nan sahari itu, rami urang di rumah Siti Ramadhani, hiruak-pikuak anak-anak, anak-anak bamain dilaman, lah malam candonyo hari, tapasang lampu sitarongkeng, lampu tapasang limo buah, di laman di dalam dapua, sarato rumah tigo buah, tarang sarupo siang hari, taraso paneh dalam rumah.
Tadanga adzan di surau, adzan sumbahyang isya, langang rumah sakatiko, urang bajalan pai ka surau, kan iyo Siti Ramadhani, darah di dado turun naiak, hati didalam indak sanang, malang untuang buruak bagian, dapek laki tukang gerobak,urang hitam kumuah pilo, abuak Panjang muko capuak, raso tampak muko si Siti Ramadhani, tak ado urang saburuak inyo.
 

Lah duo malam di rumah Siti Ramadhani, indak maliek rupo romanyo, tiok hari gilo manangih, hilang aka Syamsu, ruponyo bini dapek kabaji, indak suko kapado awak, minyak habih samba tak lamak. Bakato Syamsu, bakato babisiak-bisiak, “manolah Siti Ramadhani adiak kanduang, duo malam ambo disiko, adiak rintang manangih juo, indak ado hati nan elok, ruponyo adiak indaksuko, banci maliek badan ambo”.
 

Lorong urang balaki bini, sarumah tango kawan hiduik, samo suko manyukoi, samo sayang manyayangi, tibo di badan diri kito, sakandang balain baun, sabaua mangko batingkuah, ambo tak suko nan bak kian. Manolah adiak Siti Ramadhani, kalau adiak indak suko, hari bisuak kito hetong, dibukak buhua nan bakapek, pulang nak pulang katampuaknyo, pasanang malah hati adiak. 

Galak tasanyum si Siti Ramadhani, lalu bakato maso itu, “ tuan banamo Syamsu Ali, samo sikolah di parabek, mangko ambo indak suko, ambo nan salah sangko, di kiro si Syamsu si tukang garobak. 

Tagalak pulo si Syamsu, “kok adiak banci  kapado ambo, saba ambo tantang itu, barisuak juo ambo bajalan, tapi saketek nan marusuah, kalau bacarai kito bisuak, apolah pulo kato urang”. Mandanga kato nan bak kian, tagak sugiro Siti Ramadhani, dirangkuah bahu kaduonyo, “tuan tak buliah bajalan, badan tuan ambo nan punyo, alah manjadi miliak ambo”, bakato sadang galak, galak pulo kaduonyo, sasudah inyo galak, antahlah apo nan tajadi.
 

Lorong kapado si Syamsu, samanjak kawin jo kalasun, hati gabuak pikiran sanang,dapek basuo kahandak hati, kawan hiduik tiok hari, maliek bini sangaik sayang, balnjo dibari indak batimbang, dibalikan kain jo baju, kain baju nan maha dibali, lbrapo harago indak dihetong, nan paralu dapek kahandak hati. 

Pokok baransua habih juo, badaman limo tingga tigo,piti dipinggang licin tandeh, disiko bana nan takana , tabik sasa cilako badan, mampaturuikkan hati sanang.
Bajalan balambek-lambek, hati risau pikiran kusuik, bjalan maadok pulang, iyo karumah mandeh kanduang. 

“Mano mandeh kanduang ambo,ndo nan takilang dalam hati, ado takana dikiro-kiro, mukasuik hati ka bajalan, dicubo bajalan karantau urang, kok untuang takadiah Allah, dapek rasaki dirantau urang, tatabusi gadaian lamo, tabangkik tareh tabanam, tolong di mandeh jo ba do’a, salamaik sajo pajalanan.
 

Kalau indak ado halangan, hari sinayan Syamsu bajalan, bajalan ka tanah Medan, ambo bajalan surang sajo, indak ado kawan sarangkek. Dilapeh anak bajalan turun ka laman, bajalan bahati ibo, ibo ka mandeh jo adiak nan tingga. 
 

Lah bajalan tagontai-gontai, dituruikkan labuah nan Panjang, ado sarantang pajalanan, tibo di laman rumah Siti Ramadhani. Bakato Syamsu, “manolah adiak Siti Ramadhani, kamano garam mandeh kito, tolong himbau agak sabanta. 

“Manolah mandeh janyo ambo, ado sabuah nan takana, mukasuik hati ka bajalan, iyo ka rantau Medan Deli, bari izin ambo dek mandeh, mandeh lapeh jo suci hati. Mandanga kato nan bak kian, takajuik mandeh Siti Ramadhani, lalu bakato hanyo lai, “pabilo Syamsu ka bajalan, elok dirumah  Syamsu dahulu, manggaleh sarupo nan taralah”. Manjawek Syamsu , mukasuik hati ka bajalan, hari barisuak pagi-pagi dicubo pulo di Rantau urang, kok untuang, elok palangkahan”.
 

Duo kali ayam bakukuok, cukuik katigo hari siang, lah siang candonyo hari, lah sudah mamintak izin, bendi mananti di laman, naiak bendi mandeh Siti Ramadhani, baitu juo jo Siti Ramadhani, diantakan ka Bukittinggi.
 

Empat tahun kemudian………
Lorong kapado Syamsu, hati sanang pikiran gabuak, indak saketek mambaok piti, baribu-ribu pitih tabaok, cukuik ringgik puhun ameh, lah kayo gadang Syamsu, balasan marasai batahun-tahun, hujan jo paneh babalasan. 

Tapi sungguahpun nan bak kian, hiduik sarupo ilmu padi, makin barisi makin runduak, lah ampek tahun indak batamu, antah la mati ibu bapak, antan si Siti Ramadhani lah mintak pisah, inyo balaki jo urang lain, bamacam-macam pikiran tibo, baitu pikiran nan ado.
Kapa balayia siang malam,lapeh nan dari Bangkahulu, handak manjalang Taluak Bayua, raso ditulak naknyo lakeh sampai, raso katibo di Bukittinggi. 

Indak lamo sudah tu tibo di stasiun Bukittinggi, disewo bendi ka kampuang, kudo bajalan lari kancang, hampia ka tibo inyo turun, bajalan juo ka rumah mande. “ Anak denai si buyuang Syamsu, kini baru buyuang pulang, pulang mularaik anak kanduang”, bakato mandeh jo nurjani, maliek parasaian Syamsu, di papah anak di baok ka rumah.
 

Ado sabanta antaronyo, ka rumah Si Ramdhani, satu tibo inyo di rumah, tampak sakali suaminyo, iyolah Syamsu, duduak bamanuang di muko mandeh. Satu tibo disapo dek Syamsu, “dimano adiak dapek tau, bahaso ambo alah pulang, siapo nan mangatokan, kapado adiak kanduang?. 

Manjawek Siti Ramadhani, “banyak urang nan mangatokan, apo sabab tuan tak pulang, iyo kamudiak karumah ambo? Itu sababnyo ambo kamari, handak manjapuik tuan pulang. “Bialah ambo indak pulang, iko jinihnyo paruntuangan, babaju tamba tumamba, kaki sakik sajak Rantau, sudah sakik bansaik pulo, inda tacaliak muko urang. 

Mandanga kato nan bak kian, laruik pikiran Siti Ramadhani, ayia mato guruak gamurai, dihapuih juo jo salendang, bakato sadang manangih, batutua sadang sadu sadan.
 

“Tuan kanduang janyo ambo, denai indak balaki ameh, indak balaki karano piti, badan tuan ambo palaki, junjuangan ambo dunia akhirat, tampek lawan baiyo batidak, sugiro tuan tagak kini, molah kito pulang, malu jo sagan usah di pandang, lai bausaho nan bak urang, nan buruak juo nan basuo, alah takadiah dari Allah.
 

Alah tibo di ateh rumah, hari lah malam lampu tapasang, sumbahyang Syamsu, kain sumbahyang using bana, di ambiak kain dek Siti Ramadhani, kain palakat nan agak baru. 

Barisuak hari Sabtu, pasa radi di gaduang, di gaduang Bukittinggi, tibo bendi di pasa ateh, urang nan sangai rami bana, rami alek pacu kudo,di mano-mano urang dating, raso kararak bulu di badan, raminyo urang tangah pasa. Bakato kapado Siti Ramadhani, adiak tunggu disiko, ambo kapai manguntiang rambuik. Sasudah itu, taruih bajalan ka toko baju.
 

Lah dapek baju tigo halai, sarato sarawa kain saruang, dibali pulo sipatu baru, cukuik jo tirompah spasang, dipakai kupiah biludu, di pakai pado masu itu, Syamsu sarupo urang bapangkek tinggi, basuo jo Siti Ramadhani di laman toko, tacangang sajo, mamandang lakinyo Syamsu.
“Indak sakik lakek sipatu, kaki tuan nan sakik tu?” katonyo Siti Ramadhani. 

Manjawek Syamsu, “sabananyo kaki ambo indak sakit, sakik nan babuek-buek, pancuboi hati adiak. 

Bakato Syamsu, “manolah adiak Siti Ramdhani, lapehkan sagalo taragak, buliah dibali kini juo, pitih ambo lai pambali, “sakalian mambalian barang-barang untuak mandeh kanduang, adiak kanduang jo mandeh Siti Ramadhani. Salamo di rantau, rasaki ambo lai tabukak, hanyo di Medan ambo mularaik, ambo cubo ka Banjarmasin, sinan baru rasaki tabukak.
 

Pulang hanyo lai, alah tibo bendi di kampuang, tacangag mandeh Siti Ramadhani, mancaliak anak jo minantu, alah barubah sajo dari nan tadi, mancaliak pambalian anak kanduang, malu jo sagan ka minantu, muluik banyak nan tadorong, kato banyak nan talompek, tahulah urang kampuang, bahaso Syamsu, urang kayo banjar